જાણો ડિજિટલ પર્સનલ ડેટા પ્રોટેક્શન બિલની સંપૂર્ણ ABC! આ બિલનું શું છે મહત્ત્વ
આ બિલનું એક પાસું ડિજિટલ લોકો પર ધ્યાન કેન્દ્રિત કરે છે
બિલના ચાર મહત્વપૂર્ણ પાસા તૈયાર કરવામાં આવ્યા છે
ભારત સરકાર આ ચોમાસુ સત્રમાં ડિજિટલ પર્સનલ ડેટા પ્રોટેક્શન બિલ રજૂ કરી શકે છે. આ બિલને કેબિનેટની મહત્વપૂર્ણ બેઠકમાં કેન્દ્ર દ્વારા મંજૂરી આપવામાં આવી છે, હવે તેને કાયદો બનાવવા માટે સંસદમાં રજૂ કરવામાં આવશે. લોકોના અંગત ડેટાની સુરક્ષા કેવી રીતે કરવી, આ બિલ તે અર્થમાં ખૂબ જ મહત્વપૂર્ણ હોવાનું કહેવાય છે.
ડિજિટલ પર્સનલ ડેટા પ્રોટેક્શન બિલ છે શું?
ડિજિટલ પર્સનલ ડેટા પ્રોટેક્શન બિલ ગ્રાહક અને કંપનીઓ બંને માટે તૈયાર કરવામાં આવ્યું છે. જો આ બિલનું એક પાસું ડિજિટલ લોકો પર ધ્યાન કેન્દ્રિત કરે છે, તો બીજી એવી બિઝનેસ કંપનીઓને આવરી લે છે જેને સામાન્ય લોકોના ડેટાની જરૂર હોય છે. આ જ વાતને ધ્યાનમાં રાખીને આ બિલના 4 મહત્વપૂર્ણ પાસા તૈયાર કરવામાં આવ્યા છે.
1) ડેટા સુરક્ષિત રાખવાની જવાબદારી કંપનીએ લેવી પડશે
લોકોનો વ્યક્તિગત ડેટા કેવી રીતે એકત્રિત કરવામાં આવે છે. એ વાત પર ભાર મૂકવામાં આવ્યો છે કે, જો કોઈ પણ કંપની લોકોનો વ્યક્તિગત ડેટા એકત્ર કરે છે તો તેણે કાયદાનું સંપૂર્ણ પાલન કરવું જોઈએ. આ ઉપરાંત, કંપનીએ તે ડેટાને કોઈપણ કિંમતે સુરક્ષિત રાખવાની જવાબદારી લેવી પડશે.
2) ડેટા એકત્ર કરવા કોઈ નક્કર કારણ હોવું જરૂરી
જો લોકોનો વ્યક્તિગત ડેટા એકત્રિત કરવામાં આવી રહ્યો છે, તો તેના માટે કોઈ નક્કર કારણ હોવું જોઈએ. તે જ સમયે, ડેટા ફક્ત જરૂરી હોય ત્યાં સુધી સંગ્રહિત થવો જોઈએ.
3) દરેક લોકોનો ડેટા સ્ટોર કરવો ખોટું
ફક્ત તે જ લોકોનો ડેટા એકત્રિત કરવો જોઈએ, જે જરૂરી છે. તેમાં એવું પણ કહેવામાં આવ્યું છે કે, દરેક ડેટા લઇ તેને તમારી પાસે સ્ટોર કરવો તે ખોટું છે.
4) 500 કરોડ સુધીના દંડની જોગવાઈ
આ બિલનું એક મહત્વનું પાસું એ છે કે જો કોઈપણ પ્રકારનો ડેટા બ્રીચ થાય તો પણ તે કંપની અથવા આરોપી વ્યક્તિ પર 500 કરોડ સુધીનો દંડ થઈ શકે છે. એ વાત પર પણ ભાર મૂકવામાં આવ્યો છે કે જો કોઈનો અંગત ડેટા લેવામાં આવી રહ્યો હોય તો પણ તે કિસ્સામાં તેની સંમતિ લેવી જરૂરી છે.
બિલ અગાઉ પણ રજૂ કરવામાં આવ્યું હતું પરંતુ ભારે વિરોધ થયો હતો
ગયા વર્ષે નવેમ્બરમાં સરકારે આ બિલનો ડ્રાફ્ટ રજૂ કર્યો હતો. તે ડ્રાફ્ટ પણ અગાઉના બિલને બદલીને લાવવામાં આવ્યો હતો. હકીકતમાં, આ પહેલા પણ સરકારે ડેટા સુરક્ષાને લઈને બિલ લાવવાનો પ્રયાસ કર્યો હતો. પરંતુ વિપક્ષે તેમાં 88 સુધારા તરફ ધ્યાન દોર્યું હોવાથી નવું બિલ લાવવાની તૈયારી કરવામાં આવી હતી. હવે આ બિલ આ ચોમાસુ સત્રમાં રજૂ કરવામાં આવી શકે છે.